Kyzylorda-News.kz

Кеше 03 сағат 22 минутта «101» орталық өрт байланыс нөміріне Шұғыла мөлтек ауданы №4,  5 қабатты тұрғын үйдің №90 пәтерінде өрт оқиғасы болып жатқандығы туралы хабар келіп түсті.

Алты минуттан кейін оқиға орнына Қызылорда облысы Өрт сөндіру және авариялық-құтқару жұмыстары қызметінің  жауынгерлік есебі келіп,  өрт сөндіру автокөлігін орналастырып, барлау жұмыстарын жүргізді.

Барлау барысында өрт сөндіруші-құтқарушылар төртінші қабатта өрт ашық жалынмен жанып жатқанын анықтап, қосымша күш шақырылды. От пен улы түтін бесінші қабаттағы пәтерлерге енген. «ӨСжАҚЖҚ» ММ  Өрт сөндіру және авариялық құтқару жұмыстары бөлімінің бастығы, азаматтық қорғау майоры Ә.Баекеев өрт сөндіру жетекшісі ретінде «ӨСжАҚЖҚ» ММ Өрт сөндіру кезекші қызметінің жедел кезекші орынбасары, азаматтық қорғау капитаны Р.Бәйімбетовке, №2 мамандандырылған өрт сөндіру бөлімінің аға инженері,  азаматтық қорғау майоры А.Әділовке, №12 өрт сөндіру бөлімінің қарауыл бастығы азаматтық қорғау лейтенанты Ғ.Алмасбековке өрт сөндіру іс-әрекеті бойынша тапсырма беріп, олар адамдарды құтқару жұмыстарын жедел жүргізді.

Жедел іс-қимыл барысында  қою түтінге тұншыққан  2 ер адам мен 2 әйел кісіні құтқарды.

Өрт сөндірушілердің жедел іс-әрекеттерінің арқасында қаза тапқан және жарақат алғандар жоқ. 4 адамды құтқарып, осы тұрғын үйдің 25 тұрғынын қауіпсіз жерге көшірді. Жалын 4 сағат 00 минутта оқшауланып, 4 сағат 10 минутта толығымен сөндірілді. Көлемі 35 шаршы метрді құраған өрттің шығу себебі анықталу үстінде.